Elena Candia mantivo un encontro con todos os alcaldes e voceiros que tivo ao longo da historia da democracia o Partido Popular no municipio de Lugo.

A candidata do PP compartiu con eles a necesidade de impulsar o campus de Lugo como un destino atractivo para estudiar; de levar a cabo actuacións que poñan en valor o ecosistema do Miño; de incentivar o uso de transporte público; a defensa dun consumo sostible; impulsar actuacións para mellorar a contorna da muralla así como mellorar infraestruturas que redunden nunha maior seguridade viaria.

Trala xuntanza de traballo presentaron un documento con 10 medidas que a candidata popular se compromete a incluir no seu proxecto de cidade.

• Programa de aloxamento para estudantes que se matriculen no campus e construcción dunha Residencia Municipal para alumnos universitarios.
• Habilitar una bolsa de becas para os mellores expedentes académicos universitarios e de FP superior.
• Completar o cinto verde e unir os Paseos do Miño e do Rato que deixou feito, hai 25 anos, o Partido Popular así como poñer en valor todas as infraestruturas ligadas ao Miño.
• Desdobramento da Nacional VI instando ao goberno central a que acometa esta obra no tramo que é da súa propiedade, dende Garabolos ata o cruce da estrada de Santiago.
• Incentivar o uso do transporte púbico coa creación de bonos semanais, mensuais e anuais con viaxes ilimitadas.
• Promover fórmulas que incentiven a rehabilitación no casco histórico e actualización do PEPRI aprobado no ano 1997.
• Desenvolvemento das unidades de intervención que hai no recinto amurallado.
• Impulsar accións para o embelecento na contorna da muralla tanto das fachadas da Ronda como das traseiras que se ven dende o adarve.
• Posta en marcha dun equipo de asesoramento ao consumidor eficaz para mellorar a protección dos consumidores acerca de prezos, garantías de calidade e loita contra a fraude así coma análise de novas tendencias e hábitos de consumo.
• Promover compras de productos de cercanía e calidade en establecemientos de proximidade así como a creación de circuítos para reducir o despilfarro alimentario e aumento da vida útil de diferentes produtos e roupa.