Elena Candia quere que Lugo sexa unha cidade pensada para pasar a última etapa da vida polo que “cómpre reforzar o servizo de axuda no fogar (SAF) con novos perfís(podoloxía, psicoloxía…) e eliminar as listas de agarda.

A popular tamén ve necesario un apoio a esa soidade non desexada, que pode ser puntual pero que cando a dependencia avance, se o necesita, darlle unha unha asistencia integral, apostando por fórmulas innovadoras como o ‘cohousing’ no rural ou no casco histórico e apostando por centros de respiro como o que se construirá en Calde da man da asociación de familiares de enfermos de alzhéimer (AFALU).

A candidata do PP apuntaba que o seu compromiso coas persoas maiores vai encamiñado “a prestar un servizo integral en todas as fases en función do que vaian necesitando cada persoa maior”.

Maiores apoderados e activos

Tal como sinalou a candidata popular, “estas medidas reflicten un compromiso evidente coas nosas persoas maiores, que son un colectivo estratéxico que merece máis protagonismo e participación en toda a vida municipal. Baixo esta óptica, o programa de Elena Candia inclúe tamén outros compromisos para este colectivo:

1. A creación dunha Concellería de Maiores para fomentar a implicación deste colectivo dun xeito transversal en todas as áreas municipais, recoñecendo así o seu papel clave na execución do Estado do Benestar do que gozamos actualmente.
2.  A mellora na atención cidadá co uso dunha linguaxe máis sinxela nos trámites burocráticos para facelos máis comprensibles e cun cadro de persoal municipal ben dimensionado para reforzar a atención individual nas consultas telefónicas e presenciais.
3.  O impulso de programas de mellora de competencias de alfabetización dixital, así como de prevención da dependencia e de promoción social para evitar o illamento social ou a sobrecarga emocional, ao tempo que se favorece a consolidación de espazos de formación e interacción que promovan un envellecemento activo.
4.  A bonificación ata o 100% dos billetes de transporte urbano para as persoas xubiladas e pensionistas co obxectivo de reforzar a súa autonomía e minimizar a súa dependencia dos e das familiares.
5.  A creación dun consello interxeracional constituído por persoas de todas as idades para intercambiar e realizar encontros de forma periódica, de xeito que as opinións das nosas persoas maiores sexan tidas en conta no deseño de Lugo.