Cidade Creativa

Elena Candia identifica a cultura e o turismo como “os dous grandes activos económicos e de xeración de emprego nos que Lugo pode e debe ser punteiro”

A popular subliña que “como referente da cultura galega, Lugo debe posicionarse como capital cultural do noroeste peninsular xa que ten talento e recursos de sobra”

A candidata do PP á alcaldía de Lugo, Elena Candia, sitúa a adhesión de Lugo á Rede de Cidades creativas na categoría de Artes dixitais como “un dos piares centrais” da que será a súa estratexia cultural se obtén o respaldo maioritario da veciñanza. Nun acto celebrado na Casa do Saber, Elena Candia apelou á economía creativa como “o motor que debemos activar tendo en conta que somos un municipio punteiro en recursos patrimoniais, turísticos, culturais ou naturais e tamén no talento”.

Acompañada por representantes da USC, da Escola de Arte Ramón Falcón, de xestores culturais e do Secretario Xeral de Política Lingüística da Xunta, a candidata popular presentou un “proxecto para un Lugo en grande que, pensado cos pés na terra, debe aspirar a internacionalizarse cada vez máis para valorizar e aproveitar todas as oportunidades que ten, e que teñen que permitir camiñar cara un modelo de turismo de calidade máis desestacionalizado”.

Un novo modelo de planificación cultural

Elena Candia asegura que, ademais de promover dende o Concello un “verdadeiro diálogo entre distintas disciplinas, xeracións ou talentos”, tamén deben abordarse outras melloras:

A potenciación do Camiño Primitivo ao seu paso polo municipio, de xeito que se aproveite a oportunidade que supón a distancia mínima de 100 quilómetros para obter a ‘Compostela’.

O reforzo e apoio intenso a citas xa consolidadas, coma a Semana do Cine, a do Jazz ou a da Maxia, ao tempo que se potencian eventos específicos no eido da danza, das agrupacións corais ou da música tradicional, entre outros.

A optimización das infraestruturas e dotacións, comezando pola apertura inmediata do auditorio de Magoi, construído pola Xunta de Galicia cun investimento de preto de 25 millóns de euros e que leva xa tres anos pechado sen que o Concello sexa quen de poñelo en funcionamento, e pola creación dun Museo da Vestimenta.

A recuperación da emblemática banda municipal de música, que hoxe só conta cunha quincena de integrantes.

O impulso do turismo relixioso coa exposición do Santísimo Sacramento na Catedral ou a Ofrenda do Antigo Reino de Galicia.

A creación dunha marca turística que reflicta a singularidade extraordinaria de contar con tres bens Patrimonios da Humanidade (Muralla, Catedral e Camiño Primitivo).

Intensificar a colaboración coa hostelería lucense para reforzar a gastronomía como un dos nosos principais activos turísticos e culturais.

CIDADE CREATIVA

Un novo modelo de planificación cultural

CONTACTO

618 626 902